भालुको आक्रमणबाट बझाङमा बाबुछोरी घाइते

बझाङ । बझाङमा भालुको आक्रमणबाट दुई जना घाइते भएका छन् । घाइते हुनेमा थलारा गाउँपालिका –८ का ६० वर्षीय मदनराज जोशी र १३ वर्षीया देवशरा जोशी रहेको प्रहरीले जनाएको छ ।

जिल्ला प्रहरी कार्यालयका अनुसार घाइते दुबै बाबुछोरी हुन् । घर नजिकै राखिएको मौरी घार हेर्न गएका बेला उनीहरुलाई शनिबार भालुले आक्रमण गरेको प्रहरीले जनाएको छ ।

भालुको आक्रमणबाट उनीहरुको अनुहार, टाउको, शरीर र हातमा गहिरो चोट लागेको छ । घाइतेहरुको अहिले जिल्ला अस्पताल बझाङमा उपचार भइरहेको छ ।

खप्तड राष्ट्रिय निकुन्ज मध्यवर्ती क्षेत्रमा पर्ने थलारामा भालु देखिने गरेको छ । भालुले आक्रमण गरेपछि त्यस क्षेत्रका स्थानीयहरुसमेत त्रसित हुन थालेका छन् ।