February 24, 2024, Saturday
१२ फाल्गुन २०८०, शनिबार

अमेरिकी डीभी चिठ्ठाको आवेदन आज राति ९:४५ बजेदेखि खुल्दै, कसरी भर्ने ?

काठमाडौं । अमेरिकी डीभी चिठ्ठाको आवेदन आज राति ९:४५ बजेदेखि खुल्न लागेको छ । सन् २०२५ को अमेरिकी इलेक्ट्रोनिक्स डाइभर्सिटी भिसा (ईडीभी) कार्यक्रमको लागि बुधबार राति ९:४५ बजे देखि आवेदन खुल्न लागेको हो ।

काठमाडौंस्थित अमेरिकी दूतावासले जनाए अनुसार असोज १७ गते राति ९:४५ बजेबाट आवेदन दर्ता सुरु हुने छ । यो कार्तिक २१ मा नेपालमा स्थानीय समय अनुसार १०:४५ बजे बन्द हुनेछ ।

अमेरिकी दूतावासले डि.भी. चिट्ठामा प्रवेश गर्नका लागि कुनै पनि शुल्क नलाग्ने बताएको छ । आवेदन भर्दा कन्सल्टेन्टको सहयोग समेत नलिन सल्लाह दिएको छ ।

आवेदनसम्बन्धी सहयोग चाहिएमा परिवारको सदस्य, साथी वा अन्य विश्‍वासिलो व्यक्तिको सहयोग लिनेतर्फ विचार गर्नुहोला, अमेरिकी दूताबासले जारी गरेको विज्ञप्ती भनेको छ ।

अनलाइन फारम कसरी भर्ने ?

सन् २०२५ को डाइभर्सिटी भिसा चिट्ठाका लागि आवेदकहरूले दर्ता अवधिमा www.dvlottery.state.gov मा गई इलेक्ट्रोनिक डाइभर्सिटी भिसा (ई-डि.भी.) आवेदन फारम भर्नु पर्नेछ ।

दर्ता गर्दा आफ्ना पति/पत्‍नी र आवेदनको समयमा २१ वर्ष नपुगेका सबै अविवाहित सन्तानलाई सूचिकृत गर्नु अनिवार्य छ । उनीहरूलाई समावेश नगरी पेश गरिएको आवेदन अमान्य ठहरिनेछ ।

तपाईँले एउटा मात्र आवेदन बुझाउनु पर्नेछ । एकभन्दा बढी आवेदन बुझाउने आवेदकहरू चिट्ठाका लागि अयोग्य ठहरिनेछन् ।

अघिल्लो वर्षको डि.भी. आवेदनमा प्रयोग गरिएको फोटो यस वर्षको आवेदनमा प्रयोग गर्न मिल्दैन । फोटोसम्बन्धी नियमहरू कडाइका साथ पालना गर्नु पर्नेछ र प्रत्येक फोटो आफ्नो आवेदनमा समावेश भएका सही व्यक्तिहरूसँग मेल खाने गरी पेश गर्नु पर्नेछ । र, फोटो खिच्दा आवेदकहरूले चश्मा लगाउनु हुँदैन ।

डिभी भरेपछि आफ्नो कन्फर्मेसन नम्बरलाई सेभ वा प्रिन्ट गरेर राख्नुपर्नेछ । किनकी यो नम्बर नै स्टेटस चेक गर्ने एक मात्र तरिका हो ।