कैलाली –कन्चनपुरमा तीब्र गतिको मोवाईल डाटा

धनगढी, मंसिर २६ (ई–रैवार)
नेपाल टेलिकमले काठमाडौं उपत्यकाबाट वितरण प्रारम्भ गरिएको ‘एफटीटीएच’ सेवा हाल देशका अन्य ठाउँमा पनि बिस्तार गरिरहेको छ । तीब्र गतिको डाटा र भ्वाइस सेवा चलाउन मिल्ने यो सेवा सुदूरपश्चिमका कैलाली र कञ्चनपुरमा समेत चलाउन मिल्ने भएको छ । सेवा शुरु भएका नेपालभर २५ जिल्लामध्ये सुदूरपश्चिमका यी दुई जिल्लामा सेवा प्रारम्भ गरेको हो ।
जसअन्तर्गत कैलालीमा धनगढीस्थित हुलाकी रोडको क्याम्पस चोक, शिवनगर चोक, ज्ञानु प्लाजा चौराहा र चौराहाको विपरित क्षेत्रमा यो सेवा उपलब्ध गरिएको टेलिकमले जनाएको छ । यस्तै कन्चनपुरको महेन्द्रनगरस्थित बजार लाइनमा यो सेवा सुचारु भएको जनाईएको छ ।
नेपाल टेलिकमले एफटीटीएच अन्तर्गत व्यक्तिगत र कर्पोरेट युजरका साथै कम्बो प्याकेज समेत उपलब्ध गराइरहेको छ । यस अन्तर्गत एक वर्षका लागि न्युनतम ८ ‘एमबीपीएस’को प्याक जम्मा ८ हजार रुपैयाँमा उपलब्ध छ । हाल एफटीटीएच प्याकेज अन्तर्गत नयाँ लाइन जडान गर्ने ग्राहकले एक थान वाइफाई राउटर (सीपीई) र एक सय मिटर ड्रप फाइबर निःशुल्क प्राप्त गर्नेछन ।