बझाङमा दाजुको हत्या आरोपमा भाइ पक्राउ

बझाङ । बझाङमा दाजुको हत्या गरेको आरोपमा भाई पक्राउ परेका छन्। जिल्ला प्रहरी कार्यालय बझाङका अनुसार छबिसपाथिभेर गाउँपालिका-६ का घट्टेलेकका ५० वर्षीय बिजुली मन्डेला पक्राउ परेका हुन्।

बझाङका प्रहरी नायव उपरिक्षक (डिएसपी) भरतबहादुर शाहले दिएको जानकारी अनुसार बिजुली मन्डेलालाई जिल्ला प्रहरी कार्यालय बझाङबाट खटिएको प्रहरी टोलीले आइतबार पक्राउ गरेको हो। उनले शुक्रबार धारिलो हतियार प्रयोग गरी ६० वर्षीय दाजु जैलु मण्डेलाको हत्या गरेको डिएसपी शाहले जानकारी दिए।

हत्यापछि आरोपी बिजुली फरार भएका थिए। हत्याको कारणबारे भने हालसम्म खुलेको छैन। पक्राउ परेका बिजुलीलाई जिल्ला प्रहरी कार्यालय ल्याइरहेको डिएसपी शाहले बताए।