February 24, 2024, Saturday
१२ फाल्गुन २०८०, शनिबार

बाजुरामा चट्याङबाट दिदीको मृत्यु, बहिनी घाइते

बाजुरा । बाजुरामा चट्याङ लागेर एक जनाको मृत्यु भएको छ भने एक जना घाइते भएकी छिन् । जिल्ला प्रहरी कार्यालय बाजुराका अनुसार चट्याङ लागेर बडीमालिका नगरपालिका-६ का एकैघरका दिदीको मृत्यु भएको छ भने बहिनी घाइते भएकी छिन् ।

जिल्ला प्रहरी कार्यालयका प्रहरी निरीक्षक दानसिंह भण्डारीले दिएको जानकारी अनुसार गएराति चट्याङ लागेर बडीमालिका नगरपालिका(६ कोर्धकी १२ वर्षीया प्रतिक्षा रावलको मृत्यु भएको छ । चट्याङ लागेर मृतक रावलकी बहिनी नौ वर्षीया रोजिता रावल घाइते भएकी हुन् ।

कोर्ध गाउँको थला लेकमा दुवैजना राति सुतेको अवस्थामा चट्याङ लागेको थियो । प्रतिक्षाको घटनास्थलमै मृत्यु भएको प्रहरी निरीक्षक भण्डारीले बताए ।

चट्याङ लागेर एउटा भैँसी, एउटा पाडो र एउटा गोरुसमेत मरेको छ । घाइते रोजिताको मार्तडीस्थित जिल्ला अस्पतालमा उपचार भइरहेको प्रहरीले जनाएको छ ।