कांग्रेस १५औँ महाधिवेशन : देउवा पक्षले कहाँ-कहाँ गर्‍यो अधिवेशन ? यस्तो छ पछिल्लो अवस्था

काठमाडौं । नेपाली कांग्रेसका निवर्तमान सभापति शेरबहादुर देउवा पक्षले १५औँ महाधिवेशनका लागि तय गरेको संगठनात्मक अधिवेशन निर्धारित कार्यतालिकाअनुसार अघि बढाउन सकेको छैन। असोज १५ गतेभित्र वडा अधिवेशन सक्ने लक्ष्य राखिए पनि असोज २८ गतेसम्म ६३६ वडा अधिवेशन हुन बाँकी छन्।

पूर्वमहामन्त्री शशांक कोइरालालाई १५औँ महाधिवेशन तयारी समिति संयोजक बनाएर जिल्ला संयोजक तोक्दै देउवा पक्षले अधिवेशन प्रक्रिया अघि बढाएको थियो। वडा, पालिका, प्रदेश सभा क्षेत्र, प्रतिनिधि सभा क्षेत्र हुँदै जिल्ला अधिवेशनसमेत सुरु गरिए पनि तल्लो तहका अधिवेशन नसकिँदै माथिल्ला तहमा प्रवेश गरिएको छ।

१५औँ महाधिवेशन सचिवालय समन्वय समितिका संयोजक दीपकप्रसाद कुईकेलका अनुसार अहिलेसम्म ६ हजार १०७ वडामा अधिवेशन सम्पन्न भएको छ। कांग्रेसका देशभर ६ हजार ७४३ वडा छन्। बाँकी ६३६ वडामा अधिवेशन हुन सकेको छैन।

अधिवेशन भएका वडामा देउवा पक्षले सर्वसम्मत नेतृत्व र क्षेत्रीय प्रतिनिधि चयन गरेको जनाएको छ। पालिकातर्फ पनि निर्धारित लक्ष्य पूरा हुन सकेको छैन। ७५३ स्थानीय तहमध्ये ४८० पालिकामा मात्रै अधिवेशन सम्पन्न भएको छ। कुईकेलका अनुसार कोशीमा ८९, मधेसमा ५४, बागमतीमा ७०, गण्डकीमा ५०, लुम्बिनीमा ८६, कर्णालीमा ५५ र सुदूरपश्चिममा ७६ पालिकामा अधिवेशन भएको छ।

अझै कोशीका ४८, मधेसका ८२, बागमतीका ६४, गण्डकीका ५०, लुम्बिनीका २३, कर्णालीका २४ र सुदूरपश्चिमका २२ पालिकामा अधिवेशन हुन बाँकी छ।

प्रदेश सभा क्षेत्रीय अधिवेशन पनि आधाभन्दा केही बढी क्षेत्रमा मात्रै सम्पन्न भएको छ। ३३० प्रदेश सभा निर्वाचन क्षेत्रमध्ये १७० क्षेत्रमा अधिवेशन भएको छ। कोशीमा ३४, मधेसमा २६, बागमतीमा ४०, गण्डकीमा १४, लुम्बिनीमा २४, कर्णालीमा १४ र सुदूरपश्चिममा १८ क्षेत्रमा अधिवेशन सम्पन्न भएको कुईकेलले जानकारी दिए।

प्रतिनिधि सभा क्षेत्रीय अधिवेशनमा पनि उस्तै ढिलाइ देखिएको छ। १६५ निर्वाचन क्षेत्रमध्ये ८५ क्षेत्रमा मात्रै अधिवेशन सम्पन्न भएको छ। कोशीमा १७, मधेसमा १३, बागमतीमा २०, गण्डकीमा ७, लुम्बिनीमा १२, कर्णालीमा ७ र सुदूरपश्चिममा ९ क्षेत्रमा अधिवेशन भएको छ।

तल्ला तहका अधिवेशन पूरा नहुँदै देउवा पक्षले जिल्ला अधिवेशनसमेत सुरु गरेको छ। कोशीमा १, कर्णालीमा ५ र सुदूरपश्चिममा १ गरी ७ जिल्लामा अधिवेशन सम्पन्न भएको छ। अझै ७० जिल्लाको अधिवेशन हुन बाँकी छ।

तल्ला तहका अधिवेशन पूरा नहुँदै देउवा पक्षले जिल्ला अधिवेशनसमेत सुरु गरेको छ। पूर्वनिर्धारित कार्यतालिकाअनुसार अघि बढेको भए असोजभित्र वडा, पालिका र प्रदेश सभा क्षेत्रीय अधिवेशन सकिइसक्नुपर्ने थियो।

कार्यतालिकामा कात्तिक १५ गते जिल्ला अधिवेशन, मंसिर ४ गते सातै प्रदेशको अधिवेशन र मंसिर २१ देखि २३ गतेसम्म १५औँ केन्द्रीय महाधिवेशन गर्ने उल्लेख छ। तर देउवा पक्षले जिल्ला अधिवेशन भने निर्धारित मितिभन्दा अगावै सुरु गरेको छ।

गत पुसमा भएको विशेष महाधिवेशनमा सहभागी नभएको देउवा पक्षले छुट्टै प्रक्रिया अघि बढाउँदै १५औँ महाधिवेशन गर्न लागेको हो। संस्थापन पक्षले भने असोज १८ देखि २३ गतेसम्म विशेष महाधिवेशन आयोजना गरी गगन थापाको नेतृत्वमा नयाँ कार्यसमिति चयन गरेको छ।

थापा नेतृत्वको संस्थापन पक्षले पनि बाढी, पहिरोलगायतका कारण पूर्वनिर्धारित कार्यतालिकाअनुसार अधिवेशन सम्पन्न गर्न नसकेपछि समय थप गरेको थियो। यससँगै नेपाली कांग्रेसको संगठनात्मक अधिवेशन प्रक्रिया एउटै पार्टीभित्र दुई समानान्तर धारमा अघि बढेको छ।