धनगढीको रेस्टुरेन्टमा जुवातास खेलिरहेको अवस्थामा सञ्चालकसहित ११ जना पक्राउ

धनगढी । कैलालीको धनगढीस्थित एक रेस्टुरेन्टमा जुवातास खेलिरहेको अवस्थामा सञ्चालकसहित ११ जना पक्राउ परेका छन्। धनगढी उपमहानगरपालिका–४ उत्तरबेहडीस्थित तड्का रेस्टुरेन्टबाट बिहीबार बेलुकी उनीहरूलाई प्रहरीले पक्राउ गरेको हो।

गोप्य सूचनाका आधारमा वडा प्रहरी कार्यालय धनगढीबाट खटिएको प्रहरी टोलीले रेस्टुरेन्टमा छापा मारेर उनीहरूलाई पक्राउ गरेको जनाएको छ।

पक्राउ पर्नेमा रेस्टुरेन्ट सञ्चालकसमेत रहेका अछामको साँफेबगर नगरपालिका–३ घर भई हाल धनगढी उपमहानगरपालिका–४ उत्तरबेहडीमा बस्दै आएका २३ वर्षीय सुरेश कुँवर पनि छन्।

प्रहरीले पक्राउ परेकाहरूको साथबाट नगद २६ हजार ८५० रुपैयाँ र एक गड्डी तास बरामद गरेको छ। घटनाबारे थप अनुसन्धान भइरहेको प्रहरीले जनाएको छ।