भजनीमा मोटरसाइकल दुर्घटना, चालकको मृत्यु

धनगढी : कैलालीको भजनीमा मोटरसाइकल दुर्घटना हुँदा चालकको मृत्यु भएको छ।

भजनी नगरपालिका–४ कुडीस्थित भजनी–सुख्खड सडकखण्डमा बुधबार राति करिब ९ बजे धनौराबाट भजनीतर्फ आउँदै गरेको सुदूरपश्चिम प्रदेश ०१–०१२ प १६५१ नम्बरको मोटरसाइकल सालको रुखमा ठोक्किँदा दुर्घटना भएको हो।

दुर्घटनामा भजनी–१ मधुवन शिविरका करिब ३० वर्षीय मुकेश चौधरी गम्भीर घाइते भएका थिए। मोटरसाइकल सडकबाट करिब २० मिटर तल नालीमा पुगेको प्रहरीले जनाएको छ।

टाउकोमा गम्भीर चोट लागेका चौधरीलाई एम्बुलेन्समार्फत प्राथमिक स्वास्थ्य केन्द्र भजनी पुर्‍याइएको थियो। तर, राति करिब ९ः४० बजे चिकित्सकले उनलाई मृत घोषणा गरेका थिए।

शव प्राथमिक स्वास्थ्य केन्द्र भजनीमा राखिएको छ। घटनाबारे थप अनुसन्धान भइरहेको प्रहरीले जनाएको छ।