सेती नदीको बीचमा थुनिएका एकजनाको सशस्त्र प्रहरीद्वारा उद्धार

डोटी साउन २६ (ई-रैवार)

सेती नदीमा बढेको भेलसंगै बगेर आएका दाउरा बटुल्न जाँदा बीच नदीमा थुनिएका एकजना युवकको सशस्त्र प्रहरीले उद्धार गरेको छ ।

सोमबार बाढीसंगै बगेर आएका दाउरा बटुल्न गएका शिखर नगरपालिका–८ गोपघाटका ३२ बर्षिया कबि बलायर दिउँसो साढे ४ बजेतिर बीचनदीमा थुनिएका थिए ।

उनलाई सशस्त्र प्रहरी बल नम्बर ३६ गण हेडक्वार्टर दिपायल डोटीबाट सशस्त्र प्रहरी निरीक्षक केशबराज अवस्थीको नेतृत्वमा गएको टोलीले साँझ करिब साढे छ बजे उद्धार गरेको हो ।

टोलीमा नौजना सशस्त्र प्रहरीको टोली परिचालन भएर गएको सशस्त्र प्रहरी नायक निरीक्षक दीपेन्द्र बोहराले जानकारी दिए ।