युवकद्वारा क्वारेन्टिनमा आत्महत्या

बर्दिया, साउन १२ (ई-रैवार)

एक युवकले क्वारेन्टिनमा आत्महत्या गरेका छन । अछामको बन्निगढी गाउँपालिका घर भएका रामबहादुर सावदले बर्दिया ठाकुरबाबा नगरपालिकाको क्वारेन्टिनमै आत्महत्या गरेका हुन ।

उनले क्वारेन्टिन पछाडिको रूखमा तन्नाको पासो लगाएर आत्महत्या गरेको ईलाका प्रहरी कार्यालय भुरिगाउँले जनाएको छ।

प्रहरीका अनुसार भारतको राजस्थानबाट आएका युवक ठाकुरबाबा नगरपालिका ४ सैनवार बस्ने आफन्त कहा गएका थिए । आफन्तले क्वारेन्टिनमा बस्नु पर्ने भन्दै प्रहरीलाई खबर गरेपछि युवकलाई प्रहरीले ४ दिन अघि क्वारेन्टिनमा लगेको थियो ।

आइतबार मात्रै उनको पीसीआर परिक्षणका लागि स्वाब संकलन गरी पठाइएको थियो। तर रिपोर्ट नआउँदै उनले आत्महत्या गरेका छन । रिपोर्ट नआएकाले उनको शव घटनास्थलमै रहेको ईलाका प्रहरी कार्यालय भुरिगाउँले जनाएको छ।