पत्रकारको रगतले वृद्धको ज्यान जोगियो

बाजुरा असार ५(ई-रैवार)

बाजुराका तिनजना अगुवा पत्रकारको रगतले एकजना ७० वर्षिय वृद्धको ज्यान जोगिएको छ ।

बुढीनन्दा नगरपालिका–९ पाण्डुसैनका ७० वर्षीय वृद्ध गोरे गुरुङको शरीरमा पानीको मात्रा बढी र रगतको मात्रा कम भएपछि ज्यानको जोखिम भएको थियो ।  सोही अवस्थामा नेपाल पत्रकार महासंघ बाजुरा-बझांगका संस्थापक सभापति एवं नेपाल प्रेस युनियनका केन्द्रीय सदस्य दयाराम पण्डित, नेपाल प्रेस युनियन बाजुराका अध्यक्ष प्रेम रौले र  नेपाल पत्रकार महासंघका सचिव प्रेम विकले एक/एक प्वाईन्ट रगत प्रदान गरेका थिए । नेपाल रेडक्रस सोसाइटीका प्रयोगशाला इन्चार्ज जगत शाहीको आग्रहमा पत्रकारहरूले रगत प्रदान गरेका हुन ।

रगत पाएपछि बृद्ध गुरूङको ज्यान बचेको जिल्ला अस्पताल बाजुराका प्रमुख डाक्टर रुपचन्द्र विश्वकर्माले बताए ।