फिफा विश्वकप २०२६ : अन्तिम सेकेन्डमा मार्टिनेलीले गरेको गोलले ब्राजिलसँग जापान स्तब्ध

काठमाडौं : फिफा विश्वकप २०२६ अन्तर्गत राउण्ड अफ ३२ को खेलमा ब्राजिलले जापानलाई २-१ ले हराउँदै अन्तिम १६ मा आफ्नो स्थान सुरक्षित गरेको छ। खेलको ९५औं मिनेटमा ग्याब्रिएल मार्टिनेलीले गरेको गोल ब्राजिलका लागि निर्णायक बन्यो। अब ब्राजिलले अर्को चरणमा नर्वे वा आइभोरी कोस्टसँग प्रतिस्पर्धा गर्नेछ।

खेलको पहिलो हाफमा जापानले उत्कृष्ट प्रदर्शन गरेको थियो। ब्राजिलका ड्यानिलोले गरेको एउटा गल्तीको फाइदा उठाउँदै जापानका काइशु सानोले गोल गरेर आफ्नो टोलीलाई १-० को अग्रता दिलाए। पहिलो हाफभरि ब्राजिलले जापानको बलियो रक्षापंक्ति तोड्न निकै संघर्ष गर्नुपरेको थियो।

दोस्रो हाफमा ब्राजिलका प्रशिक्षक कार्लो एन्सेलोटीले रणनीति परिवर्तन गरे। उनले लुकास पाक्वेटाको ठाउँमा युवा स्टार एन्ड्रिकलाई मैदान पठाए र विङ्गरहरूबाट धेरै ‘क्रस’हरू गर्ने रणनीति अपनाए।

यही रणनीतिका कारण खेलको ५५औं मिनेटमा कासेमिरोले हेडमार्फत गोल गर्दै खेललाई १-१ को बराबरीमा ल्याए। त्यसको केही बेरमै भिनिसियस जुनियरले एक जापानी डिफेन्डरको खुट्टाको बीचबाट बल छिराउन उत्कृष्ट प्रहार गरे पनि बल पोलमा लागेर फर्किएको थियो।

खेल अतिरिक्त समयतर्फ धकेलिने निश्चित जस्तै देखिएको थियो। तर, इन्जुरी समयको अन्तिम सेकेन्डमा जापानका आओ तानाकाले आफ्नै डिफेन्स एरियामा बल गुमाए। सोही अवसरको फाइदा उठाउँदै ब्रुनो गुइमारेसले दिएको पासमा मार्टिनेलीले सटिक गोल गर्दै ब्राजिललाई सनसनीपूर्ण जित दिलाए।

जापानका लागि यो हार निकै पीडादायी रह्यो। कप्तान वातारु एन्डो र काओरु मितोमा जस्ता मुख्य खेलाडीहरू चोटका कारण टोलीमा नभए पनि जापानले पाँच पटकको विश्व विजेता ब्राजिललाई कडा टक्कर दिएको थियो। जापानले पहिलो हाफमा देखाएको जुझारुपन र रक्षात्मक कौशल तारिफयोग्य थियो, तर अन्तिम क्षणको एउटै गल्ती उनीहरूका लागि महँगो सावित भयो।

यस जितसँगै ब्राजिलको विश्वकप यात्रा जारी छ भने जापानको विश्वकप नकआउट चरण जित्ने प्रतीक्षा अझै लम्बिएको छ।

 फिफा विश्वकपको नकआउट चरणमा यसअघि पनि जापानले विपक्षी विरुद्ध अग्रता लिएर हार बेहोरेको थियो । सन् २०१८ मा बेल्जियम विरुद्ध अन्तिम १६ मा जापानले २-० को अग्रता लिएर पछि ३-२ ले पराजित भएको थियो । यस्ते २०२२ मा क्रोएसिया विरुद्ध १-० ले अग्रता लिएर पछि पेनाल्टी सुटआउटमा पराजित भएको थियो ।