१७ वर्षपछि बलात्कार मुद्दाका अभियुक्त घरमा भेटिए

धनगढी : १७ वर्षदेखि फरार जबरजस्तीकरणी मुद्दाका अभियुक्तलाई प्रहरीले पक्राउ गरेको छ। पक्राउ पर्नेमा कञ्चनपुरको पुनर्वास नगरपालिका–२ अमरैयाका ५४ वर्षीय बुरु (बिरा) राना रहेका प्रहरीले जनाएको छ।

जिल्ला अदालत कञ्चनपुरले उनलाई २०६४ साल जेठ २० गते बलात्कार मुद्दामा दोषी ठहर गर्दै तीन वर्ष कैद सजाय सुनाएको थियो। तर, फैसला भएपछि उनी लामो समयदेखि फरार रहँदै आएका थिए।

प्रहरीका अनुसार जिल्ला प्रहरी कार्यालय कञ्चनपुर र इलाका प्रहरी कार्यालय त्रिभुवनबस्तीबाट खटिएको संयुक्त टोलीले उनलाई उनकै घरबाट पक्राउ गरेको हो।