February 24, 2024, Saturday
१२ फाल्गुन २०८०, शनिबार

केआईसिंह राजमार्ग अवरुद्ध, वर्षा नरोकिदा पहिरो हटाउन समस्या

धनगढी । अविरल वर्षापछि पहिरो जाँदा केआईसिंह राजमार्ग अवरुद्ध भएको छ । डडेलधुराको गन्यापधुरा गाउँपालिका वडा नम्बर २ रडुवामा पहिरो खस्दा केआईसिंह राजमार्ग सेवा अवरुद्ध भएको हो । 

डडेल्धुराका प्रहरी नायब उपरीक्षक (डिएसपी) मनोहरप्रसाद भट्टका अनुसार शनिबार रातिदेखि लगातार आइरहेको वर्षाले गर्दा अवरुद्ध पहिरो हटाउन समस्या भएको छ । सडक अवरुद्ध हुँदा दुईतर्फी बाटो बन्द भएको छ । वर्षा नरोकिएको हुँदा पहिरो हटाउन नसकिएको उनको बताएका छन् ।

प्रहरीका अनुसार राजमार्गको माथिबाट पहिरोले ढुङ्गा र रुखहरू बगाएको छ । वर्षा नरोकिएको र पहिरो जाने क्रमसमेत जारी रहेकाले सडक मर्मतको काम सुरुसमेत भएको छैन । वर्षा रोकिएपछि मर्मतको काम सुरु गर्ने प्रहरीले जनाएको छ ।

सुदूरपश्चिम प्रदेशका तीन पहाडी जिल्ला डोटी, अछाम र बाजुरा जोड्ने राजमार्ग अवरुद्ध भएपछि आवतजावत रोकिएको छ । सडक अवरुद्ध हुँदा यात्रुहरू अलपत्र परेका छन् ।