कैलालीमा ट्याक्टर दुर्घटना हुँदा एकको मृत्यु, दुईजना घाइते

काठमाडौं । कैलालीमा ट्याक्टर दुर्घटना हुँदा एकजनाको मृत्यु भएको छ । दुईजना घाइते छन् । कैलालीको मोहन्याल गाउँपालिका–५, तालबन्दमा ट्याक्टर दुर्घटना हुँदा चक्र जेठाराको मृत्यु भएको हो ।

जिल्ला प्रहरी कार्यालय कैलालीका अनुसार ट्याक्टरमा सवार गौरीगंगा नगरपालिका–७ का ४५ वर्षीय जेठाराको उपचारका क्रममा धनगढीस्थित सेती प्रादेशिक अस्पतालमा मृत्यु भएको हो ।

घाइते भएका मोहन्याल–५ का २० वर्षीया निर्मला रोकामगर र ४० वर्षीया गौमती विकको सोही अस्पतालमा उपचार भइरहेको छ । हिजो बेलुका करिब पौने ८ बजे से२त २८५० नम्बरको ट्याक्टर अनियन्त्रित भई पल्टिएको थियो । ट्याक्टरसहित चालकलाई प्रहरीले नियन्त्रणमा लिएको छ ।