बैतडीमा बस दुर्घटना : ९ जनाको मृत्यु, ३४ घाइते, ४ जनाको सनाखत

बैतडीको दोगडाकेदार-६ सित्तडका २५ वर्षीय प्रहरी जवान रणबहादुर चन्द, सित्तडकै २७ वर्षीय करनसिंह ऐर, कपिन्द्रप्रसाद जोशी र कञ्चनपुर भीमदत्त नगरपालिका-८ की १५ वर्षीया कृतिका कार्कीको सनाखत भएको बैतडी प्रहरी प्रमुख नारायणप्रसाद अधिकारीले जानकारी दिए।

बैतडीमा भएको बस दुर्घटनामा घाइते ८ जनालाई थप उपचारको लागि धनगढी रेफर गरिएको छ । डडेल्धुरा अस्पतालमा उपचार सम्भव नभएपछि थप उपचारका लागि धनगढी रेफर गरिएको बैतडीका प्रहरी प्रमुख प्रहरी नायव उपरीक्षक अधिकारीले जानकारी दिए ।

दार्चुलाको गन्नाबाट महेन्द्रनगरका लागि छुटेको पवनदुत यातायातको ना ५ ख ५१४१ नम्बरको पाटन नगरपालिका ८ खोड्पे बजार नजिकै दुर्घटनामा परेको हो । दुर्घटनामा ९ जनाको मृत्यु भएको प्रहरी प्रमुख अधिकारीले बताए ।

दशरथचन्द राजमार्गमा भएको दुर्घटनामा चालकसहित अन्य ३४ जना घाइते भएका छन् । बस सडकबाट करिव ५ सय मिटर तल खसेको प्रहरीले जनाएको छ । दुर्घटनाको कारण भने खुल्न नसकेको प्रहरीले जनाएको छ ।