रिडीकोटमा ट्र्याक्टर दुर्घटना हुँदा एकको मृत्यु, दुई घाइते

अछाम, असोज २७ (ई-रैवार) 

अछाममा ट्र्याक्टर दुर्घटना हुँदा एक जनाको मृत्यु भएको छ, भने २ जना घाइते भएका छन । अछामको साँफेबगर नगरपालिका–७ रिडीकोटमा ट्र्याक्टर दुर्घटना हुँदा १८ वर्षीय राजु नगाजीको मृत्यु भएको हो ।

सुदूरपश्चिम प्रदेश प्रहरी कार्यालय दिपायलका अनुसार सोमबार साँझ बालुवा बोकेको से१त ८३३८ नंको ट्र्याक्टर दुर्घटना हुँदा नगाजीको घटनास्थलमा नै मृत्यु भएको छ ।

दुर्घटनामा परी ट्र्याक्टरमा सवार अन्य दुई जना घाइते भएका छन् । घाइतेको स्थानीय अस्पतालमा उपचार भइरहेको छ । दुर्घटनाको थप कारण भने नखुलेको सुदूरपश्चिम प्रदेश प्रहरीले जनाएको छ ।