भारतमा कोरोना संक्रमित २७ लाख नाग्यो, पछिल्लो २४ घण्टामा मात्र ५५ हजार ७९ संक्रमित थपिए

काठमाडौं,  भदौ २ (ई-रैवार)

भारतमा कोरोना भाइरस (कोभिड–१९) बाट संक्रमित हुनेको संख्या २७ लाख नाघेको छ । भारतको स्वास्थ्य मन्त्रालयले दिएको जानकारी अनुसार समग्र संक्रमितको संख्या २७ लाख २ हजार ७ सय ४३ पुगेको हो ।

पछिल्लो २४ घण्टामा मात्र भारतमा कोरोना भाइरसका ५५ हजार ७९ नयाँ संक्रमित फेला परेका हुन् ।

भारतमा कोरोना भाइरसको कारण मृत्यु हुनेको संख्या पनि ५१ हजार ७ सय ९७ पुगेको छ । पछिल्लो २४ घण्टामा मात्र भारतमा कोरोना भाइरसको कारण ८ सय ७६ जनाको मृत्यु भएको हो ।

अमेरिका र ब्राजिलपछि भारत कोरोना भाइरसबाट सबैभन्दा प्रभावित बनेको मुलुक हो । अहिलेसम्म भारतमा १९ लाख ७७ हजार ७ सय ८० जना संक्रमित निको वा डिस्चार्ज भइसकेका छन् ।

स्रोत : एएनआई