कारागारबाट रेशम चौधरीलाई वीर अस्पताल लगियो

काठमाडौं, साउन २३ (ई-रैवार)

कैलालीको टिकापुर घटनाका दोषी रेशम चौधरी अस्पताल भर्ना भएका छन् । डिल्लीबजार कारागारमा रहेको उनको स्वास्थ्यमा समस्या देखिएपछि अस्पताल भर्ना गरिएको हो ।

डिल्लीबजारस्थित कारागारका जेलर गणेश आचार्यका अनुसार चौधरीको खुट्टा र मुटुमा समस्या देखिएपछि वीर अस्पताल भर्ना गरिएको हो ।

२०७२ भदौ ७ गते सुरक्षाकर्मीसहित ८ जनाको ज्यान जानेगरी भएको टीकापुर हत्याकाण्डका मुख्य अभियुक्त भन्दै जिल्ला अदालत कैलालीले चौधरीलाई दोषी ठहर गरेको थियो ।

चौधरी २ वर्षदेखि डिल्लीबजार कारागारमा जेल जीवन बिताइरहेका छन् । अदालतले चौधरी सहित ११ जनालाई जन्मकैद फैसला सुनाएको थियो । चौधरी प्रतिनिधिसभा निर्वाचनमा कैलाली १ बाट राष्ट्रिय जनता पार्टीको तर्फबाट विजयी भएका थिए ।