दुर्गा प्रसाईंको घरमा प्रहरीको खानतलासी, मोबाइल र आईप्याड नियन्त्रणमा

काठमाडौं : मेडिकल व्यवसायी एवं राष्ट्र, राष्ट्रियता, धर्म, संस्कृति र नागरिक बचाउ महाअभियान, नेपालका संयोजक दुर्गा प्रसाईंको घरमा प्रहरीले खानतलासी गरेको छ।

बिहीबार बेलुका जिल्ला प्रहरी परिसर भक्तपुर र काठमाडौं उपत्यका अपराध अनुसन्धान कार्यालयको संयुक्त टोलीले भक्तपुरको मध्यपुर थिमि नगरपालिका–कमेरोटारस्थित प्रसाईंको निवासमा खानतलासी गरेको हो।

प्रहरी स्रोतका अनुसार ठूलो संख्यामा पुगेको टोलीले घरमा खानतलासी गर्नुका साथै केही थान मोबाइल डिभाइस र आईप्याडसमेत नियन्त्रणमा लिएको छ।

खानतलासीको कारणबारे प्रहरीले भने हालसम्म औपचारिक रूपमा केही जानकारी दिएको छैन।

पछिल्लो समय प्रसाईं लघुवित्त पीडितहरूको आन्दोलनमा सक्रिय छन्। शान्तिसुरक्षामा बाधा पुर्‍याएको आरोपमा उनी यसअघि पनि पटक–पटक पक्राउ पर्दै आएका छन्।