संघिय संसदका १२ वटा समितिले आज पाउँदै सभापति, १० वटा समितिमा एकल उम्मेदवार

काठमाडौँ : संघिय संसदका १२ वटा समितिले आज सभापति पाउँदैछन् । प्रतिनिधिसभा अन्तर्गतका १० वटा विषयगत समिति र २ वटा संयुक्त समितिका सभापतिको निर्वाचन हुन लागेको हो । 

संसद् सचिवालयका अनुसार आज बस्ने सम्बन्धित समितिको बैठकमा सभापति निर्वाचन गर्ने कार्यसूची छ । सभापतिको निर्वाचनका लागि बिहीबार नै संघीय संसद् सचिवालयमा सभापतिका लागि मनोनयन दर्ता भइसकेको छ । एउटा एकल र एउटा संयुक्त समितिमा दुई जनाको उम्मेदवारी परेको छ भने १० वटा समितिमा एकल उम्मेदवार परेको छ । 

सभापतिका लागि एकल उम्मेदवारी परेका समितिहरूमा कानून न्याय तथा मानवअधिकार समितिमा समीक्षा बास्कोटा, कृषि सहकारी तथा प्राकृतिक श्रोत समितिको सभापतिमा अशोक चौधरी, सार्वजनिक लेखा समितिमा कांग्रेसका भरत बहादुर खड्का, अन्तर्राष्ट्रिय सम्बन्ध र पर्यटन समितिमा सुम्नीमा उदास, अर्थ समितिमा कृष्णहरि बुढाथोकी र उद्योग समितिको सभापतिमा रहवर अन्सारीको मनोनयन दर्ता छ ।

त्यसैगरी पूर्वाधार विकास समितिमा आशिष गजुरेल, महिला तथा सामाजिक मामिला समितिमा आकृति अवस्थी, राज्य व्यवस्था तथा सुशासन समितिमा हरि ढकालको मनोनयन परेको छ । 

शिक्षा स्वास्थ्य तथा सूचना प्रविधि समितिको सभापतिमा रास्वपाका डा. ओजस्वी शेरचन र एमालेका गुरु बरालको मनोनयन दर्ता भएको छ ।

त्यस्तै संयुक्त समिति अन्तर्गत संसदीय सुनुवाइ समितिमा बोधनारायण श्रेष्ठले मनोनयन दर्ता गरेका छन् । राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिको सभापतिमा रास्वपाका गणेश कार्की र नेकपाका तर्फबाट राष्ट्रिय सभा सदस्य मदन कुमारी शाह (गरिमा) ले मनोनयन दर्ता गरेका छन् ।

शुक्रबार बस्ने समिति बैठकमा मनोनयनसम्बन्धी प्रस्ताव निर्णयार्थ प्रस्तुत हुने र सभापति निर्वाचित भएको घोषणा हुने सचिवालयले जनाएको छ ।