तीन पालिकामा अछाम काँग्रेसले गर्यो सत्ता गठबन्धनको निर्णय अस्वीकार

अछाम : नेपाली काँग्रेस अछामले स्थानीय तहको निर्वाचनका लागी तीन पालिकामा तालमेलको सहमति अस्वीकार गरेको छ । सत्ता गठबन्धनले स्थानीय तह निर्वाचनमा तालमेलको सहमति गरेपनि नेपाली काँग्रेस अछामले तीन पालिकाको तालमेल सहमति अस्वीकार गरेका हो।

नेपाली काँग्रेस नगर तथा गाउँकार्य समितिको बैठकले साँफेबगर नगरपालिका, रामारोशन र चौरपाटी गाउँपालिकामा चुनावी तालमेल नगर्ने निर्णय गरेका हुन् ।

काँग्रेस साफेबगर नगर सभापति लालबहादुर कुँवरले काँग्रेस बलियो रहेको क्षेत्रमा तालमेल गरेर जान नसकिने बताएका छन् । उनले काँग्रेसको जनाधारको कदर हुनेगरी निर्णय लिइएको बताए । यी तीन पालिकामा काँग्रेस, माओवादी केन्द्र र एकीकृत समाजवादीले दाबी गरिरहे पनि सहमति जुट्न सकेको थिएन ।