बझाङमा १० जनाको आरडिटी रिपोर्ट पोजेटिभ

बझाङ जेठ २ (ई-रैवार)

बझाङमा र्यापिड डाईग्नोस्टिक टेस्ट(आरडिटी) परिक्षण गर्दा १० जनाको रिपोर्ट पोजेटिभ देखिएको छ । दुईहप्ताअघि झुलाघाट र धार्चुला नाकाबाट  भित्रिएका १० जनामा आरडिटी रिपोर्ट ‘पोजेटिभ’ देखिएको हो।  पोजेटिभ देखिनेमा वित्थडचिर गाउँपालिकाका आठजना  र बुंगल गाउँपालिकाका दुई जना छन । उनिहरू सबै क्वारेण्टाईनमा राखिएका थिए ।

१४ दिन क्वारेन्टाइनमा राखेपछी शुक्रबार आरडिटी परीक्षण गर्दा उनिहरूको  रिपोर्ट पोजेटिभ आएको  हो ।

आरडिटी ‘पोजेटिभ’ देखिएकाहरुको थ्रोड स्वाब संकलन गरेर पिसिआर जाँच गर्न धनगढी पठाइएको स्वास्थ्य कार्यालय बझाङका प्रमुख भानु जोशीले बताए । आरडिटी पोजेटिभ देखिएका व्यक्तिहरुलाई जिल्ला अस्पताल सिमखेतको आइसोलेसनमा ल्याइएको छ । महाकाली पारिबाट बझाङमा आएका पाँचसय जना र अन्य जिल्लाबाट आएका गरी पाचसय ३१ जना क्वारेन्टाइनमा बस्दै आएका थिए । उनिहरू सबैको आरडिटी परिक्षण भईरहेको छ