डडेल्धुरामा जीप दुर्घटना हुदाँ २ जनाको मृत्यु, ३ जना घाइते

डडेल्धुरा : डडेल्धुरामा जीप दुर्घटना हुदाँ दुई जनाको मृत्यु भएको छ। भिमदत्त राजमार्ग अन्तरगत पर्ने डडेल्धुराको अमरगडी नगरपालिका-७ खस्र्याखानमा जीप दुर्घटना हुदाँ २ जनाको मृत्यु भएको हो ।

धनगढीबाट दार्चुला तर्फ जाँदै गरेको सु.प.प्र ०१ – ००१ ज १८५० नम्बरको बोलेरो जीप शनिबार बिहान करिब २ बजेको समयमा दुर्घटना हुदा २ जनाको मृत्यु भएको हो भने चालकसहित ३ जना घाइते भएका छन् ।

जिल्ला प्रहरी कार्यालय डडेल्धुराका सूचना अधिकारी भास्कर चन्दले दिएको जानकारी अनुसार दुर्घटनामा परी मृत्यु हुनेमा दार्चुलाको अपिहिमाल गाउँपालिका -१ का अन्दाजी ४५ सुगन लोथ्याल र सोही ठाउका अन्दाजी २८ वर्षीय हनु लोथ्याल रहेको छन् ।

प्रहरीका अनुसार घाइते हुनेमा दार्चुलाको मार्मा गाउपालिकाका ५० वर्षीय अमरसिंह ठगुन्ना र अपिहिमाल गाउँपालिका-१ का वर्ष ३५ वर्षीय सरस्वती लोथ्याल रहेका छन् ।

यसैगरी जीप चालक बैतडीको डिलासैनी गाउँपालिका-२ का अमृत घरेडी पनि घाइते छन् । घाइते तीनै जनाको डडेल्धुरा अस्पतालमा उपचार भइरहेको छ । जीप सडकबाट करिब ४ सय मिटर तल खसेको छ ।

दुर्घटनाको कारण खुल्न सकेको छैन ।