सुदूरपश्चिमसहित आज ६ प्रदेशमा भारीदेखि धेरै भारी वर्षाको सम्भावना

धनगढी : सुदूरपश्चिमसहित आज ६ प्रदेशमा भारीदेखि धेरै भारी वर्षाको सम्भावना रहेको छ ।

हाल देशभर मनसुनी वायूको प्रभाव रहेकोले मनसुनको न्यून चापीय रेखा सरदर स्थानभन्दा केही माथि छ। यसको प्रभावले काठमाडौं लगायत विभिन्न भूभागमा बिहानैदेखि पानी परिरहेको छ।

सुदूरपश्चिम प्रदेशका पहाडी भू-भागका एक-दुई स्थानमा भारी देखि धेरै भारी वर्षाको सम्भावना रहेको महाशाखाले जनाएको छ।

साथै मधेश, कर्णाली, बागमती, गण्डकी र लुम्बिनी प्रदेशका तराई भू-भागका एक-दुई स्थानमा समेत भारी देखि धेरै भारी वर्षाको सम्भावना रहेको छ ।

पछिल्लो एक घन्टामा सिन्धुपाल्चोकको मेलम्चीमा २४.६ मिलिमटर वर्षा मापन भएको छ। त्यस्तै बर्दियाको कटरनियामा २३.६ मिलिमिटर वर्षा भएको छ।

शुक्रबार बिहान बागमती, गण्डकी र लुम्बिनी प्रदेशमा वर्षा भइरहेको छ। पछिल्लो चौबीस घन्टामा सिन्धुपाल्चोकको गोब्रेमा १००.८ मिलिमिटर वर्षा भएको छ। नवलपुरमा ९५.८ मिलिमिटर, देउराली नवलपुरमा ७७.६ मिलिमिटर, डाँडामा ९५.८ मिलिमिटर, चितवनको गोविन्दवस्तीमा ७८.८ मिलिमिटर वर्षा भएको छ।

शुक्रबार दिउँसो देशका पहाडी भू-भागका धेरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ।

बागमती, गण्डकी,  लुम्बिनी र सुदूरपश्चिम प्रदेशका तराई भू-भागका केही स्थानमा, मधेश प्रदेशका साथै कोशी प्रदेशका तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना रहेको महाशाखाले जनाएको छ।

राति  कोशी, बागमती र गण्डकी प्रदेशको हिमाली भूभगको केही स्थान तथा लुम्बिनी, कर्णाली र सुदूरपश्चिम प्रदेशका हिमाली भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ।