बझाङमा एक जनाको हत्या, ६ आरोपित पक्राउ

धनगढी : बझाङमा एक जनाको हत्या भएको छ । जिल्ला प्रहरी कार्यालय बझाङले दिएको जानकारी अनुसार केदारस्युँ गाउँपालिका–६ को त्याडीगाउँका ४२ वर्षीय मोहनबहादुर बोहराको हत्या भएको हो ।

जिल्ला प्रहरी कार्यालयका प्रमुख प्रहरी नायब उपरीक्षक (डीएसपी) टेकबहादुर जोराले बोहराको हत्यामा संलग्न भएको आरोपमा प्रहरीले अनुसन्धानका लागि ६ जनालाई नियन्त्रणमा लिएको बताए ।

प्रहरी नायब उपरीक्षक जोराले शुक्रबार साँझ आपसी विवादका क्रममा बोहराको हत्या गरेको पाइएकोले ६ जनालाई नियन्त्रणमा लिएर अनुसन्धान भइरहेको बताए ।

बोहराको शव मकै बारीमा फालेको अवस्थामा फेला परेको छ । डीएसपी जोराले अहिले उनीहरूमाथि अनुसन्धान भइरहेको बताउँदै घटनाबारे विस्तृत विवरण त्यसपछि सार्वजनिक गरिने जानकारी दिएका छन् ।