ब्राउन सुगरसहित नेपालका ३ युवक भारतमा पक्राउ

धनगढी : ब्राउन सुगरसहित तीन जना नेपाली नागरिक भारतमा पक्राउ परेका छन्। भारतको खिरी जिल्लामा लागूऔषध ब्राउन सुगरसहित कैलालीका तीन जना नेपाली नागरिक पक्राउ परेका हुन्।

एसएसबीका अनुसार सोमबार साँझ खिरी जिल्लाको सम्पूर्णानगरस्थित बसही क्षेत्रमा भारतीय सीमा सुरक्षा बल (एसएसबी) र प्रहरीको संयुक्त टोलीले उनीहरूलाई नियन्त्रणमा लिएको हो।

पक्राउ पर्नेहरूमा कैलालीको गोदावरीका प्रदीप चौकाल, विनोद पुन मगर र विमल चन्द रहेका एसएसबीले जनाएको छ। उनीहरू सवार पल्सर मोटरसाइकलबाट ८ दशमलव ५० ग्राम ब्राउन सुगर बरामद गरिएको हो।

पक्राउ परेका तीनै जनालाई आवश्यक कानुनी कारबाहीका लागि सम्पूर्णानगर प्रहरीको जिम्मा लगाइएको छ। पछिल्लो समय कञ्चनपुरको दक्षिणी सीमा क्षेत्रमा लागूऔषध ओसारपसारका घटनाहरू बढ्दै गएका छन्।