डोटी बस दुर्घटनाका मृतक र घाईते सबैको सनाखत(नाम ठेगाना सहित)

डोटी साउन २८ (ई-रैवार)
डोटीको पूर्वीचौकी गाउँपालिका–१ खिरसैनमा भएको बस दुर्घटनाका मृतक तथा घाईतेहरु सबैको सनाखत भएको छ ।
जिल्ला प्रहरी कार्यालय डोटीका अनुसार दुर्घटनामा मृत्यु हुने तीनजनामा चौरपाटी गाउँपालिका–७ मार्कु अछामका बसका सहचालक समेत रहेका ३१ वर्षीय टीकाराम बिक, बान्नीगढी जयगड गाउँपालिका–३ धामीगाउँका ६० वर्षीय पदम साउँद र साँफेबगर नगरपालिका–२ घर भई हाल कैलाली नारायणपुर–४ बस्ने ५५ लछिमादेबी बिकको मृत्यु भएको छ ।
प्रहरीका अनुसार ३३ जना घाईते भएका छन् । जसमध्ये छजना गम्भिर घाईते भएका छन् । गम्भिर घाईते हुनेहरुमा बान्नीगढी गाउँपालिका–३ की ३७ वर्षीया धना साउँद, सोही ठाउँका २८ वर्षीय रेवन्त साउँद, मंगलसेन नगरपालिका–७ की २२ वर्षीया सीता जनाला, सोही ठाउँका ४४ वर्षीय गोरे ढुंगाना, ४५ वर्षीया कल्धरी बिक र साँफेबगर नगरपालिका–७ का १० महिनाका विनय भण्डारी रहेका छन् ।
यस्तै सामान्य घाईते हुनेहरुमा बान्नीगढी गाउँपालिका–३ का ३१ वर्षीय अर्जुन साउँद, २३ वर्षीय भरत साउँद, २३ वर्षीय गणेश साउँद, मंगलसेन नगरपालिका–७ का २५वर्षीय रमेश जनाला, २२ वर्षीया खीमा जनाला, उनकी दुई वर्षीया छोरी सृष्टि जनाला, १७ वर्षीय उमेश बिक, २१ वर्षीय दिनेश शाही, ३० वर्षीय रवि बिक, १५ वर्षीया भरोसा जनाला, २२ वर्षीया गीता जनाला, २७ वर्षीय मनिष जनाला, ९ महिनाका मनिष जनाला, ३० वर्षीय दीपक शाही, ३८ वर्षीय गणेश कुमार जैगढी र मंगलसेन नगरपालिका–४ का २९ वर्षीय नवराज बिक रहेका छन् ।
यस्तै साँफेबगर नगरपालिका–७ की २९ वर्षीया अस्मिता भण्डारी, पाँचवर्षीया दुर्गा भण्डारी, विनायक नगरपालिका–८ का २९ वर्षीय मनोज नचेल, ४ वर्षीय रोशन नचेल, ३२ वर्षीया पार्वती नचेल, ३५ वर्षीय धिरेन्द्र नेपाली, १८ वर्षीय सुरेश बिक, १६ वर्षीय खेमराज भोटेल, ३९ वर्षीय राम रावल, २० वर्षीय प्रकाश थापा र कैलाली गोदावरी नगरपालिका–२ वनखेत बस्ने २६ वर्षीय हेमबहादुर खत्री सामान्य घाईते रहेको प्रहरीले जनाएको छ । यीमध्ये खत्री बस चालक पनि हुन् ।
जिल्ला प्रहरी कार्यालय डोटीका प्रहरी उपरीक्षक जनकराज पाण्डेका अनुसार घाईतेहरुको अहिले जिल्ला अस्पताल डोटीमा उपचार भईरहेको छ । उनीहरुमध्ये १२ जनालाई धनगढी र नेपालगञ्ज रेफर गर्ने तयारी भईरहेको छ ।
गौरिफण्टा नाकाबाट भित्रिएका नेपाली नागरिक बोकेर धनगढीबाट अछाम जाँदैगरेको ना ६ ख २५२९ नम्बरको यात्रुबहाक बस बुधबार बिहान ६ बजेतिर पूर्वीचौकी गाउँपालिका–१ फुलौटमा दुर्घटनामा परेको थियो ।
दुर्घटनाको कारण भने अझै खुलिसकेको छैन् । ‘प्रारम्भिक रुपमा स्थलगत अध्ययन गर्दा खराब सडकमा बस अनियन्त्रित भएर डिलतर्फ गएको देखिन्छ,’ प्रहरी उपरीक्षक पाण्डेले भने,‘त्यसपछि डीलको सहत भाँसिएर बस तल खसेको छ ।’
चालक स्वयम् पनि घाईते अवस्थामा रहेकाले उपचारमा छन् ।