धनगढीमा भारतीय गाडीको ठक्करबाट एक जनाको मृत्यु
धनगढी : धनगढीमा भारतीय गाडीको ठक्करबाट एक जनाको मृत्यु भएको छ । जिल्ला प्रहरी कार्यालय कैलाली दिएको जानकारी अनुसार धनगढी उपमहानगरपालिका–३ स्थित बोराडाँडी चोकमा भारतीय नम्बर प्लेटको गाडीको ठक्करबाट मोटरसाइकल पछाडि सवार यात्रुको मृत्यु भएको हो ।
प्रहरीका अनुसार आइतबार राति कैलालीको धनगढी उपमहानगरपालिका–३ स्थित बोराडाँडी चोकमा यूपी ६५ ईएक्स ०१०० नम्बरको भारतीय गाडीले से ४ प ९५२ नम्बरको मोटरसाइकललाई ठक्कर दिएको हो।
दुर्घटनामा मोटरसाइकलको पछाडि सवार बैतडीको सिगास गाउँपालिका–४ का ४८ वर्षीय पदम चन्द गम्भीर घाइते भएका थिए। उनलाई तत्काल उपचारका लागि माया मेट्रो अस्पताल पुर्याइए पनि उपचारकै क्रममा राति करिब पौने ११ बजे मृत्यु भएको जिल्ला ट्राफिक प्रहरी कार्यालय कैलालीले जनाएको छ।
मोटरसाइकल चालक गौतम ऐर भने दुर्घटनाबाट सकुशल रहेका छन्।
दुर्घटनापछि ठक्कर दिने भारतीय नम्बर प्लेटको गाडी र चालक घटनास्थलबाट फरार भएका छन्। फरार गाडी र चालकको खोजी कार्य जारी रहेको प्रहरीले जनाएको छ।
प्रतिकृया दिनुहोस्