बन्चरो प्रहार गरी एक युवकद्वारा आफ्नै काकीको हत्या

बैतडी : बैतडीमा एक युवकले आफ्नै काकीलाई बन्चरो प्रहार गरी हत्या गरेका छन् । प्रहरीले दिएको जनकारी अनुसार सिगास गाउँपालिका–२, पेडेगोदामा एक युवकले आफ्नै काकीलाई बन्चरो प्रहार गरी हत्या गरेको हो ।

जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयका अनुसार सोही स्थानका ३० वर्षीय यज्ञसिंह धामीले आइतबार राति करिब ११ बजे आफ्नै काकी ३४ वर्षीया बेलमती धामीलाई घरभित्रै बन्चरो प्रहार गरी हत्या गरेका हुन् ।

घटनापछि प्रहरीको टोलीले तत्कालै युवक यज्ञसिंहलाई नियन्त्रणमा लिएको छ । हुलाकका अतिरिक्त कर्मचारी रहेका यज्ञसिंह हालै मात्रै कैलालीबाट घर फर्किएका थिए । उनी यही भदौ १९ गते घर आएका हुन् ।

हत्या हुने बेलमती एकल महिला रहेको र उनका चार छोरी तथा एक छोरा रहेका प्रहरीको प्रारम्भिक अनुसन्धानमा उल्लेख छ । शवलाई पोस्टमार्टमका लागि जिल्ला अस्पताल बैतडी लगिएको प्रहरी निरीक्षक पाण्डेयले बताए ।

आफन्त जयसिंह धामीका अनुसार घर फर्किएलगत्तै उनले आफ्नै आमा माथि समेत कुटपिट गरेका थिए । हत्याका कारण अहिलेसम्म खुल्न नसके पनि उनको मानसिक अवस्था सामान्य नरहेको आफन्तहरूले बताएका छन् । यज्ञसिंहकी पत्नी वैदेशिक रोजगारीमा रहेकी छन् । उनका एक छोरा र एक छोरी छन् ।