बडीकेदार गाउँपालिकाद्वारा चार जना बिद्यार्थिलाई सम्मान

डोटी । डोटीको बडीकेदार गाउँपालिकाले चार जना बिद्यार्थिलाई सम्मान गरेको छ । आइतबार एक कार्यक्रमका बिच पालिकाका विभिन्न तहमा अध्ययनरत चार जना बिद्यार्थिलाई सम्मान गरेको हो ।

बडीकेदार गाउँपालिका शिक्षा युवा तथा खेलकुद शाखा प्रमुख विवेक देउवाले पालिकाले एसइइ परीक्षामा उत्कृष्ट नतिजा ल्याउन सफल एक छात्रा र एक छात्र र आधारभूत तह कक्षा ८ मा पालिका स्तरमा उत्कृष्ट नतिजा ल्याउने एक छात्र र एक छात्रालाई नगद सहित सम्मान गरेको बताएका हुन ।

२०८० सालको एसइइ परीक्षामा सामेल भई २०८१ मा प्रकाशित नतिजामा पालिकाभरि उत्कृष्ट नतिजा ल्याउन सफल भएका शिवजी माध्यामीक विद्यालय वडा नम्बर ४ मा अध्ययनरत छात्र तिलक थापामगर (३.२५ जिपिए) र सोही विद्यालयमा अध्ययनरत छात्रा राधा जेठरा (३.२२ जिपिए) लाई प्रमाण पत्र सहित नगद जनही ५० हजारका दरले सम्मान गरिएको शाखा प्रमुख देउवाले बताए ।

त्यसैगरी आधारभूत तह पालिका अन्तरगत कक्षा ८ मा उत्कृष्ट नतिजा ल्याउन सफल विष्णु मावि मुलेचौर वडा नम्बर ३ की छात्रा सुनिता कुमारी सार्की(३.६७ जिपिए) र विष्णु मावि बरालगाउँ वडा नम्बर ४ का छात्र जीवन सार्की(३.५९) लाई प्रमाण पत्र सहित नगद जनही ४० हजारका दरले सम्मान गरिएको छ ।

उत्कृष्ट नतिजा ल्याउने बिद्यार्थिलाई सम्मान गर्दा विद्यार्थीलाई प्रोत्साहन मिल्नुका साथै अरू बिद्यार्थिहरुलाई पनि प्रतिस्पर्धाको वातावरण बन्न सहजता हुने बडीकेदार गाउँपालिकाका प्रमुख प्रशासकीय अधिकृत शेर बहादुर बुढाले बताए ।

पालिकाको शैक्षिक गुणस्तर सुधारका लागि विभिन्न कार्यक्रमहरू सञ्चालन गर्दै आइरहेको बडीकेदार गाउँपालिकाकी उपाध्यक्ष डम्मरी विष्ट कलेलले बताइन् । विद्यार्थिहरु लाई सम्मान गर्दा शैक्षिक गुणस्तरमा सुधार हुनुका साथै बिद्यार्थिहरु मा स्वयं अध्ययन गर्ने बानीको विकासमा सहयोग पुग्ने समेत उपाध्यक्ष विष्ट कलेलले बताइन् ।

शैक्षिक गुणस्तर अभिवृद्धिमा सहजता होस भन्ने हेतुले पालिका अन्तरगतका उत्कृष्ट बिद्यार्थिहरुलाई सम्मान गरिएको बडीकेदार गाउँपालिकाका अध्यक्ष भैरव बहादुर साउँदले बताए । पालिकाको शैक्षिक गुणस्तर सुधार गर्नका लागि पालिकाले एक वडामा एक नमुना विद्यालय, असहाय, टुहुरा बालबालिकाहरूको लागि निःशुल्क आवासीय विद्यालय, आधुनिक कम्प्युटर ल्याब सहितको व्यवस्थापन, स्थानीय पाठ्यपुस्तक निमार्ण तथा कार्यान्वयन लगायतका सवालहरूमा पालिकाले निरन्तरता कार्य गर्दै आइरहेको अध्यक्ष साउदले बताए ।

बिद्यार्थिहरुलाई सम्मानको कार्यक्रमलाई आगामी दिनमा पनि निरन्तरता दिने अध्यक्ष साउँदले बताउछन ।