कांग्रेसको बहिष्कारबीच सुदूरपश्चिममा बजेट पारित गर्ने तयारी, पूरक बजेट ल्याउन नेकपा सहमत

धनगढी । सुदूरपश्चिम प्रदेशसभामा बजेट पारित गर्ने तयारी भइरहँदा प्रमुख प्रतिपक्षी दल नेपाली कांग्रेसले सदन बहिष्कार गर्ने निर्णय गरेको छ। सत्तारूढ नेपाल कम्युनिस्ट पार्टी (नेकपा) ले भने बजेट पारित गर्दै विवादित विषय छानबिन गर्ने र कात्तिक १५ गतेभित्र पूरक बजेट ल्याउने सहमति गरेको छ।

मंगलबार बसेको नेकपा संसदीय दलको बैठकले आइतबार प्रदेशसभामा प्रस्तुत बजेट पारित गर्ने र त्यसमा उठेका विवादित विषय संसदीय छानबिनमार्फत टुंग्याउने निर्णय गरेको हो। नेकपा सांसद अक्कल रावलका अनुसार छानबिन नसकिएसम्म बजेटको पुँजीगत खर्च रोक्ने सहमति पनि भएको छ।

‘अहिले आइतबार सार्वजनिक भएकै बजेट पारित गर्ने, तर पुँजीगत खर्च रोकेर विवादित विषय छानबिन गर्ने र कात्तिक १५ भित्र पूरक बजेट ल्याउने सहमति भएको छ,’ रावलले भने।

आर्थिक वर्ष सुरु भएको करिब तीन महिनापछि प्रस्तुत भएको बजेटलाई लिएर सत्तारूढ दलभित्रै असन्तुष्टि चुलिएको थियो। सत्तापक्षकै सांसदहरूले बजेट निर्माणमा बिचौलियाको प्रभाव, कमिसनको खेल र पहुँचका आधारमा योजना छनोट गरिएको आरोप लगाउँदै आएका थिए।

आर्थिक मामिलामन्त्री चक्रबहादुर मल्लले आइतबार प्रदेशसभामा ३७ अर्ब ७० करोड रुपैयाँको बजेट प्रस्तुत गरेका थिए। बजेटमाथिको छलफल सुरु नहुँदै विवाद बढेपछि प्रदेशसभा बैठक प्रभावित हुँदै आएको छ। मंगलबार बिहान ९ बजेका लागि बोलाइएको बैठकसमेत विवादकै कारण दिउँसो १ बजेका लागि सारिएको थियो।

यता, कांग्रेसले बजेट जनपक्षीय नभएको र सरकारले प्रतिपक्षीसँग आवश्यक समन्वय नगरेको आरोप लगाउँदै सदन बहिष्कार गर्ने निर्णय गरेको छ। कांग्रेस संसदीय दलका नेता तथा निवर्तमान मुख्यमन्त्री कमलबहादुर शाहले मंगलबारदेखि प्रदेशसभाका सबै बैठक बहिष्कार गर्ने जानकारी दिएका छन्।

सत्तारूढ दलभित्र बजेट पारित गर्ने र विवादित विषय छानबिन गर्ने सहमति भए पनि प्रमुख प्रतिपक्षी कांग्रेसको बहिष्कारका कारण सुदूरपश्चिममा बजेट पारित गर्ने प्रक्रिया राजनीतिक विवादबीच अघि बढ्ने देखिएको छ।