धनगढीको आयल निगमको डिपो तत्काल सार्न स्थानीयले गरे माग

धनगढी : नेपाल आयल निगम लिमिटेडको सुदूरपश्चिम प्रादेशिक डिपो तत्काल स्थानान्तरण गर्न स्थानीयले माग गरेका छन् । कैलालीको धनगढी उपमहानगरपालिका–३ चटकपुरस्थित घनाबस्तीबिचको बिचमा रहेको आयल निगमको डिपो स्थानान्तरणका लागि दुई वर्षदेखि स्थानियले माग गर्दै आएका हुन ।

धनगढी उपमहानगरपालिका–३ चटकपुरस्थित आयल निगम लिमिटेडको डिपो स्थानान्तरणका लागि दुई वर्षदेखि काम भइरहेको भनिए पनि हालसम्म कुनै परिणाम नदेखिएपछि तत्काल स्थानान्तरण गर्नुपर्ने माग राख्दै स्थानीयद्वारा डिपो प्रमुखको ध्यानर्कषण गराएका हुन् ।  

डिपोसँगै जोडिएको शुभकामना टोल विकास संस्थाले तत्काल डिपो स्थानान्तरण नगरे आन्दोलनमा उत्रिन बाध्य हुने भन्दै आइतबार प्रादेशिक डिपोका कार्यालय प्रमुखलाई ध्यानर्कषण पत्र बुझाएका छन् ।

शुभकामना टोल विकास संस्थाका अध्यक्ष दीर्घराज ओझाका अनुसार घना बस्तीबिचको डिपोलाई तत्काल सार्नुपर्ने माग गरेका छन् । ‘दुई वर्ष अघिदेखि डिपो स्थानान्तरणको प्रक्रिया अघि बढेको भनिएको छ तर अहिलेसम्म परिणाम आएको छैन’, अध्यक्ष ओझाले भने, ‘तत्काल डिपो स्थानान्तरण गरेर स्थानीयलाई ढुक्कसँग बसोबास र पेसा व्यवसाय गर्न सक्ने अवस्था बनाउन आन्दोलनका कार्यक्रम अघि बढाउँदै छौं ।’

शुभकामना टोलमा ८७ घरधुरी छन् । ती घरमा पाँच सय तीनजना मानिसको बसोबास रहेको संस्थाले जनाएको छ । केहीवर्ष पहिले जंगल रहेको डिपो आसपास अहिले बाक्लो बस्ती छ । धनगढी–अत्तरिया सडक खण्डमा रहेको डिपो अगाडिबाट दैनिक हजारौं सवारी साधन गुड्छन् । नजिकै धनगढी नेत्रालय, सिपी अस्पतालसहित अन्य स्वास्थ्य संस्था, विद्यालय र व्यापारिक भवन छन् ।

अध्यक्ष ओझाले पेट्रोलियम पदार्थ भण्डारण गरिएका ठुलाठुला ट्यांक नजिकै भएको र डिपोबाट इन्धन लोड–अनलोड भइरहँदा घरमा आगो बाल्न पनि डराउनुपर्ने अवस्था रहेको बताए । ‘कतिबेला के हुन्छ भन्न सकिन्न । डिपोका कारण सधैंको चिन्ता’, अध्यक्ष ओझाले भने, ‘स्थानीयले ढुक्कसँग जीवनयापन गर्न सकेका छैनन्, घरमा आगो बाल्न पनि डराउनुपर्ने अवस्था छ ।’  

उनले आफूहरूको माग १५ दिनभित्र सम्बोधन नभए चरणवद्ध आन्दोलनमा उत्रिने चेतावनी समेत दिए ।

स्थानीयको दबाबपछि निगमले धनगढीको डिपो स्थानान्तरण गर्ने योजना अगाडि बढाएको थियो । कञ्चनपुरको पुनर्वास नगरपालिका वडा नम्बर ३ र ५ मा रहेको राष्ट्रिय आवास कम्पनीले २२ बिघा जग्गा निगमलाई बिक्री गर्ने प्रस्ताव अघि बढाए पनि स्थानीयको विरोधपछि उक्त जग्गाखरिदमाभने अन्योल देखिएको छ ।

नेपाल आयल निगम लिमिटेड प्रादेशिक कार्यालय सुदूरपश्चिमका कार्यालय प्रमुख हरिदत्त जोशीले भने, ‘डिपो सार्न हामीले दुई वर्षदेखि जग्गा खोजिरहेका छौं । अहिलेसम्म जग्गा पाएका छैनौं, खोजीकार्य जारी छ ।’

कैलाली/कञ्चनपुरमा जग्गा खोजी–कार्य भइरहे पनि अहिलेसम्म जग्गा उपलब्ध हुन नसकेको उनले बताए । डिपो स्थान्तरणका लागि  कैलालीलाई नै फोकस गरेर जग्गा खोजी–कार्य भइरहेको बताउँदै उनले कैलालीमा जग्गा नपाए कञ्चनपुरतिर भए पनि जग्गा खोजी गर्ने बताए ।  

डिपो स्थानान्तरणका लागि आफूहरू २०/२२ बिघासम्म जग्गा उपलब्ध हुनुपर्ने उनको भनाइ छ । जग्गा उपलब्ध हुनासाथ डिपो स्थान्तरणको प्रक्रिया अगाडि बढाइने उनले बताए ।  

सरकारले हरेक प्रदेशमा कम्तीमा ९० दिनको माग धान्न सक्ने पेट्रोलियम भण्डारण गृहनिर्माण गर्ने योजना बनाएको छ । सोहीअनुसार सबै प्रदेशमा भण्डारण क्षमता अभिवृद्धिका काम अघि बढेका छन् । अहिलेको भण्डारण क्षमताले सुदूरपश्चिम प्रदेशको एक साताको माग पनि धान्न नसक्ने बताइएको छ ।

एक बिघा आठ कठ्ठामा फैलिएको उक्त डिपोमा अहिले डिजेल भण्डारणका लागि सात सय ६० किलो लिटरका दुई वटा भर्टिकल ट्यांक र ७० किलोलिटरको भूमिगत ट्यांक तथा पेट्रोल भण्डारणका लागि ७६० किलोलिटरको एक भर्टिकल ट्यांकर ७० किलोलिटरको भूमिगत ट्यांकसहितको संरचना छन् ।

धनगढी डिपोले सुदूरपश्चिम प्रदेशका कैलाली, कञ्चनपुर, डडेल्धुरा, बैतडी, दार्चुला, बझाङ, डोटी, अछाम र बाजुरा जिल्लामा पेट्रोलियम पदार्थ आपूर्ति गर्दै आएको छ ।

२०३७ सालमा स्थापना भएको सो डिपो अन्य प्रादेशिक डिपोको तुलनामा कम क्षेत्रफलमा सञ्चालनमा रहेको छ । उक्त डिपोबाट अहिले दैनिक एक सय किलोलिटर पेट्रोल, तीन सय किलोलिटर डिजेल तथा न्यून मात्रामा मट्टितेल बिक्री हुँदै आएको छ ।  

भारतको बन्थरास्थित इन्डियन आयल कर्पोरेसन (आइओसी) को डिपोबाट कैलालीको गौरीफन्टा नाका हुँदै धनगढी डिपोमा पेट्रोलियम पदार्थ आयात हुँदै आएको छ ।