सर्पदंशबाट किशोरीको मृत्यु

कैलाली साउन २५(ई-रैवार): कैलालीमा सर्पको टोकाईबाट एक किशोरीको मृत्यु भएको छ। जिल्लाको गौरीगंगा नगरपालिका वडा नम्बर १० सुन्दरपुरकी १४ वर्षीया किशोरी करुणा चौधरीको सर्पको टोकाईबाट मृत्यु भएको प्रहरीले जानकारी दिएको छ।
शुक्रबार राती दुई बजेको समयमा उनलाई सर्पले टोकेको थियो। उनलाई बढैपुरको सौगात क्लिनिकमा उपचारका लागि ल्याइएको थियो। क्लिनिकले नेपाली सेनाको बढैपुरमा रहेको सर्पदंस उपचार केन्द्रमा उपचारका लागि पठाएको थियो।
केन्द्रमा पनि उपचार सम्भव नभएपछि चौधरीलाई सेती अस्पताल रेफर गरिएको थियो। उनको सेती अस्पतालमा उपचारका क्रममा मृत्यु भएको कैलाली प्रहरी निरिक्षक प्रकाश डागींले जानकारी दिए।