सुदूरपश्चिम प्रदेश सभाको विशेष अधिवेशनको पाँचौँ बैठक बुधबार बस्ने

धनगढी । सुदूरपश्चिम प्रदेश सभाको विशेष अधिवेशनको पाँचौँ बैठक बुधबार बस्ने भएको छ । प्रदेश सभा सचिवालयका सूचना अधिकारी युवराज जैसीले भोली बिहान ११ बजे प्रदेश सभाको बैठक बस्ने जानकारी दिएका हुन ।

साउन पहिलो साता प्रदेश प्रमुख नजिर मियाँले सभाको विशेष अधिवेशन आह्वान गरेका थिए । अहिलेसम्म विशेष अधिवेशनमा प्रदेशको समसामयिक विषयमा छलफल हुन सकेको छैन ।

दीर्घबहादुर सोडारी नेतृत्वको प्रदेश सरकारले बजेट पारित गराउन नसकेपछि चालु आर्थिक वर्षको सुरुवातदेखि यो प्रदेश बजेट शून्यताको अवस्थाबाट गुज्रिरहेको छ ।

नवनियुक्त मुख्यमन्त्री कमलबहादुर शाहले हिजो पदभार ग्रहण गर्दै बजेट शून्यताको अवस्थाको अन्त्यका लागि प्रदेश सरकारले छिट्टै छलफल अगाडि बढाउने बताएका छन् ।