करिब १६ क्वीन्टल अवैध माछा धनगढीबाट बरामद

धनगढी । प्रहरीले करिब १६ क्वीन्टल अवैध माछा बरामद गरेको छ । धनगढी उपमहानगरपालिका-७ मनहेराबाट जिपमा ल्याउदै गरेको अवस्थामा प्रहरी टोलीले माछा बरामद गरेको हो ।

जिल्ला प्रहरी कार्यालय कैलालीका प्रहरी निरीक्षक खगेन्द्र साउँदले बेलौरी नगरपालिका-७ बस्ने २१ वर्षीय रामकुमार रानाले चलाएको सुपप्र ०१००१ च ३४१९ नम्बरको जिपबाट अवैध माछा बरामद गरिएको जानकारी दिएका हुन ।

प्रहरी निरीक्षक साउँदकाअनुसार चालकले ती माछा धनगढीबाटै खरिद गरेर ल्याएको दाबी गरेपनि पुष्टि हुने बिल भौचर नदेखिएपछि भारतबाट अवैध रुपमा ल्याएको आशंकामा बरामद गरिएको छ ।

बरामद गरिएका माछा जिल्ला प्रहरी कार्यालयले नष्ट गरेको छ भने जिप र चालकलाई आवश्यक कारवाहीका लागि भन्सार कार्यालय कैलालीमा बुझाएको साउँदले बताए ।