प्रदेश स्थापनापछि कर्णाली प्रदेशमा पहिलो पटक प्रतिपक्षमा बस्दै माओवादी

सुर्खेत । प्रदेश स्थापनापछि कर्णाली प्रदेशमा पहिलो पटक नेकपा माओवादी केन्द्र प्रतिपक्षमा बस्ने भएको छ । सोमबार माओवादीबाट कर्णाली प्रदेश सरकारमा सहभागी चारजना मन्त्रीले पदबाट राजीनामा दिएसँगै प्रदेश सरकार स्थापनापछि पहिलोपटक माओवादी प्रतिपक्षमा बस्ने भएको हो।

सङ्घीय सरकारमा नेपाली कांग्रेस र नेपाल कम्युनिष्ट पार्टी (एमाले)बीच सत्ता सहकार्य भएपछि कर्णालीमा माओवादी सरकारबाट बाहिरिएको हो। प्रदेश संरचना कार्यान्वयन भएको साढे छ वर्षमा कर्णालीमा माओवादीबाट दुईजना मुख्यमन्त्री र १८ जना मन्त्री बनेका छन्।

अब कर्णालीमा नेपाली कांग्रेस र नेपाल कम्युनिष्ट पार्टी (एमाले) बीचमा सत्ता सहकार्य हुने छ। सरकारमा सहभागी हुने विषयमा आजैदेखि छलफल सुरू हुने भए पनि केन्द्रबाट निर्देशन नआएको कांग्रेसका प्रदेशसभा सदस्य बेदराज सिंहले जानकारी दिए।