सुदूरपश्चिम प्रदेशमा थप ५ सय ५८ जनामा कोरोना संक्रमण पुष्टि, एक जनाको मृत्यु

धनगढी : सुदूरपश्चिम प्रदेशमा आज थप ५ सय ५८ जनामा कोरोना संक्रमण पुष्टि भएको छ। स्वास्थ्य निर्देशनालय दीपायलले सार्वजनिक गरेको तथ्यांकअनुसार १ हजार ६०६जनाको एन्टिजेन र ३ सय ७ जनाको पीसीआर परीक्षण गर्दा आज ५५८जनामा संक्रमण पुष्टि भएको हो।

स्वास्थ्य निर्देशनालयका अनुसार आज संक्रमण पुष्टि भएकामध्ये १०० जना भारतबाट फर्केका नागरिक हुन्। आज सुदूरपश्चिम प्रदेशका नाका भएर ९१८ जना स्वदेश फर्केका छन्।

निर्देशनालयका अनुसार प्रदेशमा ४ हजार ९९२ जना सक्रिय संक्रमित पुगेका छन्। उनीहरुमध्ये ११७ जनाको मात्रै अस्पतालमा उपचार भइरहेको छ भने अन्य सबै होम आइसोलेसनमा रहेका छन्।

सुदूरपश्चिम प्रदेशमा थप एक संक्रमितको मृत्यु भएको छ। कैलालीको गोदावरी नगरपालिका–५ का ६२ वर्षीय पुरुषको सेती अस्पतालमा मृत्यु भएको हो।