सबै परीक्षा स्थगित गर्न सीसीएमसीको सिफारिस : पहाडमा २०० र शहरमा ५०० सक्रिय संक्रमित भए निषेधाज्ञा

यसअघि मन्त्रिपरिषद बैठकले चालु रहेको परीक्षा नरोक्ने निर्णय गरेको थियो । तर परीक्षाका नाममा भिडभाड भएको र कक्षा सञ्चालन भएको भन्दै सीसीएमसीले सबै परीक्षा रोक्ने निर्णय गरेको उनको भनाइ छ ।

त्यसैगरी नेपालसँग जोडिएका अन्तर्राष्ट्रिय सीमानाका तत्काल बन्द गर्ने सरकारको तयारी छ । यसबारेमा सीसीएमसीले तयारी गरिरहेको उनले जानकारी दिए । यसअघि नै सीमा नाकामा हेल्थ डेस्क राख्ने भने पनि त्यो प्रभावकारी हुन सकेको छैन ।

यस्तै, कोभिड संकट व्यवस्थापन केन्द्रले पाँचसय भन्दा बढी सक्रिय कोरोना संक्रमित भएका जिल्लामा १५ गतेदेखि निषेधाज्ञाको तयारी गरेको छ । व्यवस्थापन केन्द्रको बैठक बसेर यस्तो निष्कर्ष निकालेको परराष्ट्र मन्त्री तथा सीसीएमसीका सदस्य ज्ञवालीले जानकारी दिए ।

परराष्ट्र मन्त्री ज्ञवालीका अनुसार पाँचसय बढी सक्रिय संक्रमित भएका जिल्लामा निषेधाज्ञा जारी गर्न भनिएको छ । पहाडमा २०० र शहरी क्षेत्रमा ५०० संक्रिय संक्रमित भएमा डीसीसीएमसीले निषेधाज्ञा गर्न सक्ने गरी सिफारिस गरिएको परराष्ट्र मन्त्री ज्ञवालीले भने- अवस्था हेरेर लकडाउनबारे निर्णय गर्ने अधिकार जिल्ला कोभिड–१९ संकट व्यवस्थापन केन्द्र (डीसीसीएमसी)लाई दिन सिफारिस गरेको छ ।