सेती प्रादेशिक अस्पतालमा थप ५३ जनामा कोरोना संक्रमण पुष्टि

धनगढी, कार्तिक ६ (ई-रैवार)

सेती प्रादेशिक अस्पतालमा आज थप ५३ जनामा कोरोना भाइरसको संक्रमण पुष्टि भएको छ। पछिल्लो २४ घण्टामा सेती प्रादेशिक अस्पतालमा ३ सय ३३ जनाको नमुना परीक्षण गर्दा ५३ जनामा कोरोना संक्रमण पुष्टि भएको हो ।

अस्पतालका सूचना अधिकारी दिलिपकुमार श्रेष्ठले कैलालीको धनगढी उपमहानगरपालिकाका २६ जना, टीकापुर नगरपालिकाका १५ जना, गोदावरी नगरपालिकाका २ जनामा कोरोना पुष्टि भएको बताएका छन् ।

कैलालीकै चुरे गाउँपालिका र गौरीगंगा नगरपालिकाका १/१ जना र ठेगाना नखुलेका २ जनामा समेत कोरोना संक्रमण देखिएको छ।

यस्तै कञ्चनपुरको भीमदत्त नगरपालिका र पुर्नवास नगरपालिकाका २/२ जना, शुक्लाफाँटा नगरपालिका र बेलौरी नगरपालिकाका १/१ जनामा कोरोना पुष्टि भएको सूचना अधिकारी श्रेष्ठले जानकारी दिए ।