‘१८ करोड दिएर पार्टी किन्ने ?’ देउवाको प्रश्न, कांग्रेसको आधिकारिकता विवाद थप चर्कियो

काठमाडौं । नेपाली कांग्रेसको आधिकारिकता विवाद सर्वोच्च अदालतमा विचाराधीन रहेका बेला पूर्वसभापति शेरबहादुर देउवाले पार्टीको आधिकारिकतासँग जोडिएको आर्थिक लेनदेनको दाबीमाथि प्रश्न उठाएका छन्।

शनिबार राष्ट्रिय सभागृहमा देउवा समूहले आयोजना गरेको काठमाडौं जिल्ला अधिवेशन उद्घाटन समारोहलाई सम्बोधन गर्दै देउवाले प्रहरी हिरासतमा रहेका इनम सापकोटाको भनिएको अडियोमा ‘१८ करोड’ रकमको प्रसंग आएको उल्लेख गर्दै त्यसबाट पार्टीको आधिकारिकता प्रभावित भएको हो कि भन्ने प्रश्न उठाए।

‘इनम सापकोटाले १८ करोड भनेको छ । बा, सानो पैसा हो त्यो ?’ देउवाले भने, ‘त्यो पैसा दिएर पार्टी किनिदियो । अब पैसामा पार्टी बेच्ने हामीले ?’

देउवाले तत्कालीन निर्वाचन आयोगका कार्यवाहक प्रमुख निर्वाचन आयुक्तले आफ्नो ज्यानलाई खतरा रहेको बताएको समाचार आफूले पढेको उल्लेख गर्दै आर्थिक लेनदेनको प्रसंगसँग त्यसलाई जोडेर प्रश्न उठाए। यद्यपि, उनले उल्लेख गरेको आर्थिक लेनदेनको दाबीको स्वतन्त्र पुष्टि भने भएको छैन।

देउवाले आफू अझै १४औँ महाधिवेशनबाट निर्वाचित कांग्रेस सभापति रहेको दाबी गर्दै आफू विदेशमा रहेका बेला विशेष महाधिवेशन गरिएको बताए। नियमित महाधिवेशन गर्न आफूले आग्रह गरे पनि त्यसको सट्टा विशेष महाधिवेशन गरिएको भन्दै उनले आफू अदालत गएको बताए।

‘म पार्टी सभापति छु, मैले महाधिवेशन गराएको छैन। त्यसकारण हामी अदालत जानुपरेको हो,’ उनले भने।

देउवाले सर्वोच्च अदालतले निष्पक्ष न्याय दिने र आफ्नो पक्षमा फैसला आउने विश्वाससमेत व्यक्त गरे। साथै, अब आफू सभापतिको चुनाव नलड्ने र सम्मानजनक रूपमा बिदा हुन चाहेको बताए।

देउवा समूहको समानान्तर महाधिवेशन तयारी

कांग्रेसको आधिकारिकता विवाद सर्वोच्च अदालतमा विचाराधीन रहेकै अवस्थामा देउवा समूहले १५औँ महाधिवेशनको तयारी अघि बढाएको छ। देउवा समूहले आगामी २१ देखि २३ मंसिरसम्म महाधिवेशन गर्ने कार्यतालिका बनाएको छ।

देउवा समूहका अनुसार वडा, पालिका, प्रदेशसभा निर्वाचन क्षेत्र, प्रतिनिधिसभा निर्वाचन क्षेत्र र जिल्ला तहका अधिवेशनहरू सञ्चालन भइरहेका छन्। हालसम्म करिब ६ हजार ७ सय वडा, ६५० पालिका, २६४ प्रदेशसभा निर्वाचन क्षेत्र र १३२ संघीय निर्वाचन क्षेत्रमा अधिवेशन सम्पन्न भएको दाबी गरिएको छ। काठमाडौंसहित ३९ जिल्लामा जिल्ला अधिवेशन भइसकेको र ३३ जिल्लामा कार्यसमिति चयन भएको समूहको भनाइ छ।

देउवा समूहले १५औँ महाधिवेशन खुलामञ्चमै गर्ने तयारी गरेको छ। उद्घाटन तथा बन्दसत्र खुलामञ्चमा, मतदानका लागि राष्ट्रिय सभागृह र खानाका लागि भृकुटीमण्डप प्रयोग गर्ने तयारी रहेको समूहका नेता दीपक कुइँकेलले बताएका छन्।

देउवा समूहले विशेष महाधिवेशनबाट चयन भएको गगन थापा नेतृत्वको कार्यसमितिको वैधानिकतामाथि प्रश्न उठाउँदै आफूहरू १४औँ महाधिवेशनको निरन्तरतामा १५औँ महाधिवेशन गर्न लागेको बताउँदै आएको छ।

‘देउवा नै आधिकारिक सभापति’

देउवा समूहका नेता प्रकाशमान सिंहले १४औँ महाधिवेशनबाट निर्वाचित देउवा नै कांग्रेसको आधिकारिक सभापति रहेको दाबी गरेका छन्। देउवाले राजीनामा नदिएको अवस्थामा विशेष महाधिवेशनबाट नयाँ नेतृत्व चयन गर्ने र निर्वाचित कार्यसमिति हटाउने अधिकार कसैलाई नभएको उनको तर्क छ।

सिंहले निर्वाचन आयोगले कांग्रेसको विधान र राजनीतिक दलसम्बन्धी कानुनी प्रक्रियालाई बेवास्ता गर्दै एकतर्फी निर्णय गरेको आरोपसमेत लगाएका छन्।

देउवा समूहका नेता कुइँकेलले पनि देउवा सभापतिबाट नहटेको र राजीनामा पनि नदिएको भन्दै आफूहरू नै आधिकारिक कांग्रेस भएको दाबी गरेका छन्।

उता, विशेष महाधिवेशनबाट गगन थापा नेतृत्वमा नयाँ कार्यसमिति चयन भइसकेको र थापा पक्षले १५औँ महाधिवेशनसमेत सम्पन्न गरिसकेको छ। देउवा पक्षले भने उक्त कार्यसमितिको वैधानिकतामाथि प्रश्न उठाउँदै समानान्तर संगठनात्मक गतिविधि अघि बढाइरहेको छ।

यसबीच देउवा समूहले थापा पक्षमा गएका नेता तथा कार्यकर्ता फर्किएमा पूर्वाग्रह नराखी जिम्मेवारी दिने बताएको छ। समूहका नेता कुइँकेलले ‘हिजो को कहाँ थियो’ नहेरी फर्कनेलाई समेटेर अघि बढ्ने बताएका छन्।